वाणिज्य विभागले एकैसाथ थाल्यो देशव्यापी अनुगमन

२०७९ असार १९

काठमाण्डौ । वाणिज्य, आपूर्ति तथा उपभोक्ता विभागले एकसाथ देशव्यापी बजार अनुगमन सुरु गरेको छ । विभागले तीन सरकारको माध्यमबाट देशव्यापी अनुगमन थालेको हो ।

बजार अनुगमनमा वाणिज्य विभाग, प्रदेश सरकारका विभाग र स्थानीय तह र ७७ वटै जिल्ला प्रशासन कार्यालयमार्फत अनुगमन सुरु गरिएको विभागले बताएको छ । विभागका महानिर्देशक लीलाप्रसाद शर्माले एकै दिन देशैभरका ७१ वटा कम्पनीलाई कारबाही गरेको बताए ।

यसक्रममा विभागले २५ वटा फर्मको अनुगमन गर्दै ९ वटालाई कारबाही गरेको छ । यस्तै, प्रदेश १ को वाणिज्य आपूर्ति तथा उपभोक्ता संरक्षण विभागले २० वटा कम्पनीको अनुगमन गरेको छ । यस्तै मधेस प्रदेश, लुम्बिनी प्रदेश तथा विभिन्न प्रदेशमा रहेका प्रादेशिक विभागमार्फत बजार अनुगमन गरिएको शर्माको भनाई छ । यस्तै ७७ वटा जिल्ला प्रशासन र स्थानीय तहमार्फत देशभर अनुगमनको कार्यलाई तीव्रता दिइएको विभागको भनाई छ ।